FDDK enkargá ku HOPE 2025

Fundashon Desaroyo Deportivo Kòrsou (FDDK) e aña aki ta keda enkargá ku organisashon di e 18 edishon di e torneo di sòftbòl "Helping Other Perserve & Excel" (HOPE) ku lo start 15 di mart próksimo na Van Engelen Ballpark.

Meta prinsipal di e torneo di HOPE ta pa generá fondo pa yuda organisashonnan ku ta den nesesidat pa sigui ekselá i motivá i duna empleadonan di kompanianan e oportunidat pa praktiká deporte, kompetí sano, traha riba “teambuilding” i sera amistat.

Despues di un eksitoso torneo den 2024 organisá pa Van Engelen Foundation, Minister di Enseñansa, Siensia, Kultura i Deporte señor Sithree van Heydoorn a aserká FDDK pa tuma e enkargo organisatorio di HOPE Softball Tournament pa asina garantisá kontinuidat di e torneo. Alabes Minister a pone hopi enfasis pa e torneo mantené e parti di disiplina i kompetensia sosial pa asina motivá mas hende pa hasi deporte.

FDDK komo organisashon enkargá ku stimulá i motivá nos komunidat pa move mas i praktiká deporte a tuma e organisashon di e torneo aki ku man habrí i lo garantisá pa esaki keda mesun eksitoso ku e añanan anterior. E aña aki lo pone atenshon riba premionan manera “Good sportsmanship” i Mihó fanatikada pa kada kategoria.

Klek aki pa registrá